28/08/2020
ភ្នំពេញ៖ ខណៈថ្មីៗនេះផ្ទុះការរិះគន់នៅតាមបណ្តាញសង្គមយ៉ាងក្តៅគគុក ក្រោយពីចេញលក់សៀវភៅមានចំណងជើងថា «Possible Crush» របស់អ្នកនិពន្ធលោក លី តារា ដែលមានការកត់ត្រានូវសូរសៀងភាសាខ្មែរជាអក្សរឡាតាំង ដោយភាគច្រើនអ្នកអក្សរសាស្រ្តជាតិនិយមសម្តែងការមិនពេញចិត្តចំពោះការនិពន្ធសៀវភៅនេះថា វាប៉ះពាល់ដល់ភាសាជាតិ។
ជារឿយៗសឹងតែគ្រប់បញ្ហា ដែលពាក់ព័ន្ធទៅនឹងរឿងសង្គម ឬតម្លៃវប្បធម៌ជាតិនោះ គេក៏រមែងឃើញវត្តមានតារាចម្រៀងស្រីពហុជំនាញ និងល្បីនៅក្នុងសង្គមសិល្បៈ ទាំងផ្នែកចម្រៀងប្រពៃណី និងសម័យ អ្នកនាង ខាត់ សុឃីម ក៏បានបញ្ចេញជាមតិយោបល់ខ្លះដែរក្នុងផ្នែកនៃការប្រើប្រាស់អក្សរសាស្រ្តជាតិមួយនេះ ដែលបានលើកឡើង ជាសំណូមពរទៅដល់យុវជនខ្មែរឲ្យស្រឡាញ់ភាសាជាតិ និងចេះប្រើអក្សរជាតិបានត្រឹមត្រូវ។
តារាចម្រៀងស្រី ដែលមានមុខរបរជាច្រើននៅក្រៅពីសិល្បៈដូចជាបើកសម្អាងការ សេវាកម្មជួលតន្រ្តីទាំងសម័យ និងតន្រ្តីប្រពៃណី មានផ្ទះជួល និងចុងក្រោយដាក់ហ៊ុនរកស៊ីពុះដីឡូត៍លក់នោះ អ្នកនាង ខាត់ សុឃីម បានសរសេរសារថា៖ «តោះរួមគ្នា ជួយជាតិ! ខ្ញុំនឹងចាប់ផ្ដើម Unfriend ឬលុបមិត្តភក្តិចោល ចំពោះមិត្តណា ដែលបានសរសេរអង់គ្លេសជាសូរសៀងខ្មែរ ឬស៊ីងខ្មែរ។ អ្វីដែលគប្បីសរសេរនោះ គឺការសរសេរខ្មែរជាសូរសៀងខ្មែរ និងសរសេរអង់គ្លេស ជាសូរសៀងអង់គ្លេស។ គោលបំណងរបស់ខ្ញុំ ចង់ឲ្យយុវជនខ្មែរសរសេរអក្សរខ្មែរ ឬអក្សរអង់គ្លេសឲ្យបានត្រឹមត្រូវ និងកាត់បន្ថយការសរសេរដែលខុសអក្ខរាវិរុទ្ធផងដែរ។ (មិត្តដែលមានឈ្មោះបែកស្លុយ) សុំទោសទុកជាមុន»។
រំពេចនោះ ក៏មានការកោតសរសើរភ្លាមពីសំណាក់ក្រុមស្រឡាញ់អក្សរសាស្រ្តជាតិដែរថា៖ «រួមគ្នាអភិរក្សអក្សរខ្មែរចូលរួមសរសេរអក្សរខ្មែរ ដើម្បីថែព្រលឹងជាតិរបស់យើង។ ខ្ញុំបាទសូមអរគុណអ្នកបង ខាត់ សុឃីម ដែលបានផ្ញើសារមួយនេះ ទៅកាន់មនុស្សទាំងអស់ដែលញៀននឹងការសរសេរអក្សរអង់គ្លេសសំនៀងខ្មែរ គឺពិតជាល្អណាស់អ្នកបង ខ្ញុំក៏ចង់ឲ្យតារាទាំងអស់ធ្វើការសំណូមពរក្មេងខ្មែរយើង ឲ្យចូលរួមសរសេរអក្សរខ្មែរឲ្យបានត្រឹមត្រូវ នៅតាមបណ្តាញសង្គមផ្សេងៗ ដោយចូលរួមលុបបំបាត់អក្សរអង់គ្លេសសំនៀងខ្មែរជាបន្ទាន់»។
ក្រោយមកក៏មានការសរសើរតារាចម្រៀងស្រីរូបនេះថា៖ «មានតែ ខាត់ សុឃីម ទេជាតារាម្នាក់ដែលគាត់ហ៊ានថា ហ៊ាននិយាយ ហ៊ានរិះគន់ចំៗ ឃើញម៉េចថាអ៊ីចឹង ក្លាហាន អ៊ីចឹងខ្ញុំចូលចិត្ត។ គឺថាគាត់ស្រឡាញ់ជាតិ សាសនា និងវប្បធម៌របស់ខ្មែរយើងណាស់ គួរឲ្យសររសើរដោយស្មោះ។ល។»។
ឯលោក លី តារា ជាម្ចាស់ស្នាដៃឈ្មោះថា «Possible Crush» ដែលរងការរិះគន់ខ្លាំងនោះបញ្ជាក់ថា គ្រាន់តែជាការច្នៃប្រឌិតសម្រាប់អ្នកអានរំសាយនូវអារម្មណ៍ដែលមានចំនួនតែប៉ុន្មានទំព័រ៕
From: phnom penh post| First12 3 Next Last(38 Items) |
- ចំនួនអ្នកទស្សនា04816164
- ថ្ងៃនេះ204
- ម្សិលមិញ708
- សប្តាហ៏នេះ204
- ខែនេះ28288
