តារា​សម្តែង​ជើង​ចាស់​ដ៏​ល្បី​ល្បាញ​របស់​សឹង្ហ​បុរី​ម្នាក់ ​គឺ​លោក​ Huang Wenyong បាន​ទទួល​មរណភាព​កាល​ពី​ថ្ងៃ​ទី​២០​ ខែ​មេសា ​ឆ្នាំ​២០១៣​កន្លង​ទៅ​ ដោយ​សារ​ជំងឺ​មហា​រីក។ រឿង​នេះ​បាន​ធ្វើ​ឲ្យ​អ្នក​គាំ​ទ្រ​របស់​លោក​ជា​ច្រើន​មាន​ការ​សោក​ស្តាយ​ជា​ខ្លាំង។ ឥឡូវ​នេះ​ ចង់​ដឹង​ទេ​ថា​ តើ​គាត់​មាន​ប្រវត្តិ​យ៉ាង​ណា​ដែរ​ ទើប​រហូត​ធ្វើ​ឲ្យ​អ្នក​គាំ​ទ្រ​មាន​ការ​សោក​ស្ដាយ​យ៉ាង​ខ្លាំង​នោះ? តោះ​ តាម​ដាន​ប្រវត្តិ​របស់​លោក​ជា​មួយ​​ Sabay។

ឈ្មោះ	កន្លែង​កំណើត​	​ថ្ងៃ​ ខែ​ ឆ្នាំ​កំណើត	អាជីព​	រយៈពេល​ក្នុង​សិល្បៈ
Huang Wenyong	ម៉ាឡេស៊ី	២៥​ កក្ដដា​ ១៩៥២	តារាសម្តែង	១៩៨១-២០១៣

ជីវិត​មុន​ចូល​សិល្បៈ​
លោក​ Huang Wenyong បាន​កើត​នៅ​ ក្នុង​ទី​ក្រុង​កូឡាឡាំពួរ​ ប្រទេស​ម៉ាឡេស៊ី។ មុន​ពេល​គាត់​ចាក​ចេញ​ពី​ប្រទេស​ម៉ាឡេស៊ី​ មក​កាន់​សង្ហិ​បុរី​  Huang ធ្លាប់​បាន​ធ្វើ​ជា​គ្រូ​បង្រៀន​ភាសា​ចិន​ម្នាក់​នៅ​ក្នុង​ទី​ក្រុង​កូឡាឡាំពួរ។

ចាប់​ផ្តើម​ប្រឡូក​ក្នុង​សិល្បៈ​
មនុស្ស​គ្រប់​គ្នា​ចាប់​ផ្តើម​ស្គាល់​តារា​សម្តែង​ជើង​ចាស់​ម្នាក់​នេះ​នៅ​ពេល​គាត់​បាន​ថត​នៅ​ក្នុង​រឿង “The  Awakening” ជា​មួយ​នឹង​តួ​អង្គ​ស្រី​ឈ្មោះ​ Xiang Yun។ បន្ទាប់​មក​ នៅ​ឆ្នាំ​១៩៩៦ គាត់​បាន​ចូល​រួម​សម្តែង​ជា​មួយ​តារា​ប្រុស​ម្នាក់​ឈ្មោះ​​ Chew Chor Meng ក្នុង​រឿង​មាន​ចំណង​ជើង​ថា “Don’t Worry, Be Happy” ដែល​រឿង​មួយ​នេះ​បាន​ធ្វើ​ឲ្យ​លោក​ទទួល​បាន​នូវ​ភាព​ល្បី​ល្បាញ​កាន់​តែ​ខ្លាំង។ សរុប​មក​ គាត់​បាន​សម្ដែង​រឿង​ក្នុង​កម្មវិធី​ទូរទស្សន៍​ជា​ភាសាចិន​ជាង​១០០​រឿង​មក​ហើយ។

បន្ទាប់​មក​ រូប​លោក​ត្រូវ​បាន​គេ​ដាក់​ឲ្យ​ឈរ​ឈ្មោះ​ជា​តារា​សម្តែង​ប្រុស​ឆ្នើម​ម្នាក់​ក្នុង​ចំណោម​តារា​សម្តែង​ប្រុស​ឆ្នើម​ទាំង​១០​រូប​ (One of the Top 10 Most Popular Male Artistes) នៅ​ក្នុង​ពិធី​ប្រគល់​ពាន​រង្វាន់​ Star Awards ចាប់​តាំង​ពី​ឆ្នាំ​១៩៩៤។



បញ្ហា​សុខភាព
Huang ​បាន​ធ្លាក់​ខ្លួន​ឈឺ​ដោយ​ជំងឺ​​ក្រពះ​ ដែល​រក​ឃើញនៅ​ខែ​កញ្ញា​ ឆ្នាំ​២០១២។ ក្នុង​អំឡុង​ពេល​នោះ​ លោក​បាន​ស្រក​ទម្ងន់​ពី​៦ ទៅ​៧​គីឡូ​ក្រាម។ ពេល​ខ្លះ ​លោក​​មាន​ជំងឺ​​គ្រុនក្ដៅ​ទៀត​ផង។ នៅ​ខែ​វិច្ឆិកា​ ឆ្នាំ​២០១២​ លោក​ត្រូវ​​បាន​ធ្វើ​រោគ​វិនិច្ឆ័យ​ឃើញ​ថា​ មាន​ជំងឺក្រពះ​ ដែល​ទាម​ទា​ឲ្យ​មាន​ការ​ព្យាបាល​ដោយ​សារធាតុ​គីមី។

ជីវិត​ផ្ទាល់​ខ្លួន
​​Huang ​ទទួល​បាន​សញ្ជាតិសឹង្ហ​បុរី​​នៅ​ខែ​តុលា​ ឆ្នាំ​២០០៨​ ​ពោល​គឺ​ក្រោយ​ពី​រស់​នៅ​ទី​នោះ​អស់​រយៈពេល​២៧​ឆ្នាំ​ទៅ​ហើយ។ តា​រា​ភាព​យន្ត​រូប​នេះ​បាន​រៀប​ការ​ និង​មាន​កូន​ពីរ​នាក់​ ​ប្រុស​ម្នាក់​ និង​ស្រី​ម្នាក់។

Huang​ បាន​ស្លាប់​នៅ​មន្ទី​ពេទ្យ​សឹង្ហ​បុរី​ នៅ​ថ្ងៃ​ទី​២០ ​ខែ​មេសា​ ២០១៣ ​វេលា​ម៉ោង​៥​រសៀល​ ក្នុង​វ័យ​៦០​ឆ្នាំ។ មូល​ហេតុ​នៃ​ការ​ស្លាប់​ គឺ​ដោយសារ​រោគ​មហារីក៕

• ឆាវ​ឆាវ​ រឿង​​ “​សាមកុក” ​​ជា​នរណា?​
• ​រំលឹក​​​កំពូល​តារា​​​​​សម្ដែង​​​ធ្វើ​ឱ្យ​អ្នក​ផ្ទុះ​សំណើច​​​​ឥត​ឈប់​ អាម៉ាប់
• ដឹង​ថា​សាក់​ឡូ​ទម្រាំ​មាន​កេរ្តិ៍​ឈ្មោះ​ល្បី​ទូទាំង​ពិភពលោក ខ្សែ​ជីវិត​គាត់​ជូរចត់​ប៉ុណ្ណា​ទេ?
• ឈិន​ឡុង​​រស់​​ឡើង​​វិញ​​ មក​រំលឹក​​ខ្សែ​ជីវិត​ប្រាប់​​មិត្ត​អ្នក​អាន
• រាជនី​សំនៀង​មាស អ្នក​ស្រី​ សិរីសុទ្ធា ជាកងទ័ព​ឆ័ត្រ​យោង (មាន​វីដេអូ)